Ma Nona Providenza mai la manca;
dal far dal ben i dis ch'la n'è mai stanca;
ed eco che par strada, on porcarant,
l'incontra, in cla giornada, Fra Costant.

-Ah padar , padar sior, gran bela vita
che Lu 'l cundus al mond, la gh'va pran drita;
mai strolich Lu n' al gh'à, mai dispiaser:
com'am piasrìa canbiar col so mester !.-

-Si placet vos di far esto contrato
cambiando li vestiti è bell'è fato,
li porchi date michi e fo ritorno,
vos ite a predicar....-

- Corpo d'un corno
ma i libar a mi , a m'ià magnà la vaca:
acom' ontia mai da far ch'a n'an so n'aca
eam capirì, Sior Padar, l'è n'afar
ch'a gh'è miga tant temp da sugatlar!-

- Filiolo , in quando a quest'eco il spediente,
cavarghela podrete istesamente;
gh'avete visto mai, sangue de dina,
ataco il pulpit quela colonbina?..

Ebene apena suso , se non parla
un pochetin raspatevi in guardarla,
e quela ogni parola immantinente
la vi dirà che Fra Costant non mente

- Sior Padar, quand la sia a sta manera
ch'al picia chì, ch'aceti volentera;
ch'al vaga Lu in-s-li piasi a contratar
che mi andarò in-dli Cesi a predicar;
ch'al staga ben sior Fra...

-Sia laudato-

( e dopo pianin tra lu, che t'ho cucato -)
e tut content al torna coi porsei
che j-era tuti gros e tuti bei.

Intant al porcarànt vestì da fra,
content come 'na pasqua , l'è rivà
a Ponte Visdacàs da l'Arcipret
ch-al gh và incontra con còta e con rochet.

-Il ben venuto, Padre, come stà?-
-No gh'è malacio, ostàsa, ben ...da frà !
-E i Padri del Convento?-
-------------------------bella chiera....
i par margaritin da primavera....-

-S'accomodi, per bacco, quà il fagoto;...
comanda qualche cosa?....-
-------------------------al porta on goto
ch'ho cors tuta matina pr' i stradei.-
(e chi momenti al dis: adrè a i porsei )

Ma riva lì 'l cerghin cme 'na saetta
ch'al vegn a dir:- Sior Padar, neh , i v' aspeta-
e come j-och i va longh' a la via
pr' andar lor du in s'al pulpit i s' invia.

A l'ultim di scalin l'è gnan rivà
che vers la colombina al s'è voltà,
e fin j' ha dit, ch'al sa gh'è mis i snoc,
e alsàndas su ch'al gh'abia schisà dl'oc.

Al fa con la mansina al segn dla Cros,
al pifar al sa sopia a pu nan pos;
e finalment in pe 'l s' indrisa su,
credent che le la diga su par lu.

Apena drit: hem! hem!...na raspadina,
al manda in diresion dla colonbina,
ma subit al s'acors che la colonba
l'è miga 'd luna da sonar la tronba.

Ah ! che spaghèt alora, che paura
gh'eva in dal corp cla povra creatura,
sentend che ormai la gent la brontolava
parchè 'l discors gnancor l'incominciava.

E raspa e catiraspa, rid la gent,
ma inutill, la pisona 'n völ dir gnent !...
Alora con li man in di cavei
i dis cl' ha dit :- Ah povr ' i me porsei !-